Foto: Michael le Grange
Daar is vir my iets spesiaals aan eenvoud – en dís presies wat hierdie slaai is. Sit dit voor met lekker tuisgebakte brood en dit kan selfs as ’n ligte ete deug.
Genoeg vir 6 persone
1 knoffelknol
3 eiergele
30 ml dijonmosterd
sap en gerasperde skil van
2 suurlemoene
350 ml kanola-olie
sout en varsgemaalde swartpeper
30 ml olyfolie
1 groot volstruisfilet van sowat 600 g
45 ml doekka-speserymengsel
50 g parmesaankaas
’n hand vol baba-slaaiblare van jou keuse
Verhit oond tot 180 ̊C. Draai knoffelknol in tinfoelie toe en plaas in warm oond. Rooster 15–20 minute of tot knoffel sag en pap is. Laat effens afkoel tot hanteerbaar en druk gaar knoffel met jou hand in ’n glasmaatbeker uit. Voeg eiergele, mosterd, suurlemoenskil en -sap en kanola-olie by. Plaas staafmenger direk op bodem van beker en skakel aan. Verwerk terwyl jy menger stadig oplig tot bo. ’n Dik mayonnaise sal vorm. Geur met sout en peper en hou eenkant. Verhit riffelpan of braaipan tot vuurwarm. Smeer filet met olyfolie en braai sowat 1–2 minute per kant tot vleis oraloor geseël maar steeds pienkaan binnekant is. Haal van hitte af. Plaas ’n groot vel kleefplastiek op werkvlak en sprinkel doekka daaroor. Plaas filet op een kant van plastiek en rol stewig op sodat hele filet met speserye bedek is. Knoop kante van plastiek stewig toe en plaas in vrieskas vir 3 uur. Sit só voor: Haal filet uit vrieskas en verwyder plastiek. Gebruik ’n skerp mes en sny vleis in papierdun skywe. Pak eweredig op opdienbord en skep knoffelmayonnaise hier en daar op vleis. Rasper parmesaankaas oor en sit voor met baba-slaaiblare.