Foto: Donna Lewis
Mossels is een van die mooiste seekosjuwele wat ek nog gesien het. Dis so eenvoudig van buite, maar binne wag vir jou koraaloranje vleis wat soos ’n spons alle geure opsuig waarin dit gaargemaak word. Eet mossels met jou hande direk uit die skulp uit – dis die beste manier om dié juwele te geniet!
Genoeg vir 6
Patattjips
8 patats, geskil en in water laat lê
750 ml sonneblomolie vir diepbraai
sout en varsgemaalde swartpeper
Mossels
45 ml olyfolie
1 ui, fyngekap
2 knoffelhuisies, fyngekap
250 ml sauvignon blanc-wyn
250 ml lemoensap
skil van 3 suurlemoene
1 kg swartmossels
sout en varsgemaalde swartpeper
1 hand vol pietersielie, grofgekap
Sny die patats met ’n skerp mes in 5 mm dik skywe. Sny elke skyf vervolgens in 5 mm breë tjips, of so breed soos jy dit verkies. Verwarm die olie in ’n kastrol. Dreineer die skyfies en gooi twee hande vol daarvan in die olie. Braai 5 minute of tot gaar maar steeds ferm. Skep op handdoekpapier uit en versprei eweredig om te dreineer – dit gaan nie brosbruin wees nie, net gaar soos gekookte aartappels. Herhaal met die res van die skyfies. Stel die temperatuur hoër en laat die olie baie warm word. Gooi die afgekoelde skyfies weer twee hande vol op ’n slag daarin en braai sowat 5–8 minute of tot die skyfies goudbruin en bros is. Dreineer op skoon papier en hou in die louoond warm terwyl jy die res braai. Geur goed met sout en peper.
Mossels: Verwarm die olyfolie in ’n groot pot. Voeg die ui en knoffel by, en roerbraai 5 minute of tot dit begin verbruin. Voeg die wyn, lemoensap en suurlemoenskil by. Bring tot kookpunt en laat 5 minute prut. Voeg die mossels by en maak die pot toe. Laat 8–10 minute stoom of tot die skulpe oopgaan. Geur goed met sout en peper. Roer die pietersielie deur en sit voor met die patattjips.