Foto: Donna Lewis
Ek droom van die dag dat ek my eie parmaham kan maak. Dis ’n baie lang proses, want die varkboud moet ingesout word en dan ’n paar maande lê om te verouder. In Suid-Afrika met sy warm klimaat kan dit gou vrot raak; tog is daar ’n paar plaaslike vervaardigers wat baie goeie parmaham maak. Die amper soet smaak daarvan is saam met geroosterde perskes ’n moet-maak!
Genoeg vir 6 persone
6 perskes, gehalveer en ontpit
45 ml olyfolie
2 rooi brandrissies, fyngekap
45 ml korrelmosterd
20 ml heuning
60 ml olyfolie
sap en skil van 1 suurlemoen
sout en varsgemaalde swartpeper
1 x 70 g-pakkie wilderoket
12 repies (70 g) parmaham
Verhit ’n riffelpan tot vuurwarm – rook moet letterlik daaruit trek. Besprinkel die snykant van die perskes met olyfolie en brandrissie. Plaas die perskes dan met die snykant na onder op die riffelpan en braai 3–5 minute of tot goudbruin. Hou eenkant. Meng die mosterd, heuning, olyfolie en suurlemoensap en -skil met ’n draadklitser. Geur goed met sout en peper. Plaas die roket op ’n mooi opdienbord en pak die geroosterde perskes bo-op. Plaas repies ham tussenin. Skep die slaaisous oor.
WENK: As jy nie parmaham kan kry nie, kan jy 250 g strepiespek in ’n warm pan tot bros braai. Laat afkoel en krummel dan oor die slaai.