Foto: Donna Lewis
Hulle sê kos is ’n internasionale taal en ek stem volkome saam. In 2012 het ek die voorreg gehad om Reza Mahammad te ontmoet. Dié Indiese sjef wat in Brittanje woon, is ’n inspirerende en baie opregte mens. Hy het dié dis vir my gekook, en ek kan dit tot vandag toe nog proe. Dankie, Reza, dat jy my keer op keer leer hoe ongelooflik veelsydig en geurig speserye is.
Genoeg vir 6
500 ml ongegeurde jogurt
1 brandrissie, fyngekap
45 ml korrelmosterd
2 knoffelhuisies, fyngekap
45 ml heuning
1 hand vol koljander, fyngekap
sap en skil van 2 suurlemoene
sout en varsgemaalde swartpeper
6 x 100 g vars salmmootjies
1 klein stukkie houtskool (charcoal)
55g (60 ml) botter, gesmelt
Meng die jogurt, rissie, mosterd, knoffel en heuning in ’n mengbak. Meng die koljander asook die suurlemoensap en -skil daarby in. Geur goed met sout en swartpeper. Plaas die salm in ’n plat oondbak en gooi die marinade daaroor. Maak seker die vis is heeltemal bedek. Steek ’n stukkie houtskool oor ’n oop vlam aan die brand en plaas dit in ’n metaalbakkie. Plaas die bakkie in die middel van die bak vis. Gooi gesmelte botter oor die kooltjie en maak die oondbak dadelik met foelie toe. Laat 3 uur in die yskas marineer. Verhit die oond tot 220 °C. Haal die vis uit die mari- nade, skud oortollige marinade af en plaas die mootjies op ’n gesmeerde bakplaat. Bak 12–15 minute of tot net gaar. Sit voor saam met groenboon-en-kekerertjie-slaai.