Gevulde hoender met die beste sampioensous ooit

8 hoenderboudjies
100 g mozzarellakaas, in repies gesny
250 g-pakkie strepiespek
sout en varsgemaalde swartpeper
140 g (250 ml) koekmeel
3 eiers, geklits
200 g fyn broodkrummels
olie vir diepbraai

Sampioensous
1 x 80 g-pakkie gedroogde sampioene
80 ml kookwater
500 ml room
1 hand vol vars koljander, fyngekap
sap en skil van 2 suurlemoene

Knip die punt van elke boudbeentjie met ’n kombuisskêr af. Gebruik dan ’n klein, skerp messie en begin waar jy die beentjie afgeknip het. Sny al langs die boudbeen af en stoot die vleis met jou vingerpunte weg – jy wil die vleis so heel moontlik hou sodat die vulsel daar kan ingaan. Lig die been dan uit en gooi weg. Draai die mozzarellarepies met spekrepies toe en druk dit in elke hoenderboudjie in. Geur goed met sout en pep- er. Doop die boudjies eers in die meel, dan in die geklitste eiers en laastens in die broodkrummels. Herhaal nog een keer sodat al die boudjies twee keer gekrummel is. Hou dit in die yskas terwyl jy die sous maak.
Week die sampioene 10 minute in die kookwater. Gooi die sampioene saam met die room in ’n pot, bring dit tot kookpunt en verlaag dan die hitte. Laat 15–20 minute kook of tot die room met die helfte verminder het. Verpulp met ’n staafmenger (stick blender) en druk die puree deur ’n sif. Voeg die koljander asook die suurlem- oensap en -skil by. Geur goed en hou eenkant. Verwarm genoeg olie vir diepbraai oor matige hitte en braai die gekrummelde hoender sowat 15–20 minute daarin of tot goudbruin en bros – moenie die olie te warm maak nie, anders gaan die broodkrummels brand voor die hoender gaar is. Dreineer op kombuispapier en sit met die sampioensous voor.

WENK: As jy die sampioensous ekstra smaak wil gee, kan jy sowat 45 ml brandewyn of sjerrie net voor opdiening daarby inroer. Dis belangrik om die sous goed met sout en peper te geur – dit help om die sampioensmaak na vore te bring.