Foto: Michael le Grange
Die mooi van dié gereg is waarvoor ’n Kerstafel vra.
Genoeg vir 6 persone
30 ml olyfolie
1 ui, fyngekap
2 knoffelhuisies, fyngekap
600 g-sak gekapte spinasie
2 wiele feta, gekrummel
sout en varsgemaalde swartpeper
1 groot forelfilet
2 x 400 g-rolle blaardeeg
1 eier, geklits
250 g-houer basiliekruidpesto
60 ml koue water
Verhit olyfolie in middelslag-pot. Gooi uie en knoffel in en roerbraai tot dit begin verbruin. Voeg spinasie by en roerbraai tot spinasie sag word. Skep spinasiemengsel uit pot en geur dit goed met sout en peper. Laat afkoel tot koud. Voeg feta by en meng deur. Verhit oond tot 180 ̊C. Voer bakplaat met bakpapier uit en plaas een vel blaardeeg op die plaat. Skep helfte van spinasiemengsel in die vorm van die visfilet op die blaardeeg. Plaas vis met velkant na onder bo-op die spinasie. Geur goed met sout en peper. Skep oorblywende spinasiemengsel bo-op vis en maak seker dit is heeltemal bedek. Verf ’n bietjie geklitste eier op die deeg rondom vis. Plaas tweede vel deeg bo-oor vis en spinasie. Maak seker dit is heeltemal bedek en sny oortollige deeg wat oorhang netjies los. Verf ook bokant van deeg met eier. Plaas in warm oond en bak 25 minute of tot goudbruin en gaar. Lig vis versigtig van bakpapier af tot op opdienbord. Meng pesto en water saam en sit voor met vis.