Foto: Donna Lewis
Een van my grootste kosvriendinne en -mentors, Jenny Morris, is iemand met ’n aansteeklike liefde vir die lewe. Sy het eenkeer beet wat sy in lemoensap gekook het, aan my voorgesit. Die kombinasie van beet en lemoen is besonder lekker. Ek maak ’n slaaisous van lemoensap en marineer gaar beetskywe daarin. Heerlik!
Genoeg vir 6-8
8 groot bete, geskil
30 ml heuning
45 ml korrelmosterd
250 ml vars lemoensap
40 ml rooiwynasyn
1 rooi brandrissie, fyngekap
sap en skil van 1 lemoen
sout en varsgemaalde swartpeper
2 lemoene, geskil en in skywe gesny
4 wiele fetakaas, gekrummel
100 g okkerneute
1 hand vol babaslaaiblare van jou keuse
Plaas die beet in ’n middelslagpot en bedek dit met koue water. Bring tot kookput en kook 25–30 minute of tot gaar maar steeds ferm. Dreineer en laat afkoel. Meng die heuning, mosterd, lemoensap, asyn, brandris- sie en suurlemoensap en -skil saam. Geur goed met sout en peper. Gebruik ’n skerp mes of mandolien en sny die afgekoelde beet in 1 mm dik skywe. Gooi dit in die lemoensous en bedek die bak met kleefplastiek. Laat 3–4 uur of oornag in die yskas marineer. Skep die gemarineerde beet op ’n slaaibord en geur dit goed met sout en peper. Rangskik die lemoenskywe bo-op en krummel die fetakaas oor. Kap die okkerneute grof op en strooi dit bo-oor. Garneer met die slaaiblare en sit voor.