Bobotie in jou 'air-fryer'

Video-produksie: Herman Lensing


Probeer gerus hierdie maklike bobotie-resep en maak dit boonop in ‘n lugbraaier ('air-fryer')!

Genoeg vir 6-8

Maalvleisvulsel
40 ml botter
1 groot ui, gekap
2–3 knoffelhuisies, fyngedruk
30 ml matige kerriepoeier
10 ml fyn borrie
60 ml suurlemoensap
1 kg beesmaalvleis
2 snye witbrood, in ’n bietjie melk geweek
1 Granny Smith-appel, geskil en gerasper
1 ryp piesang, fyngedruk
100 ml witwyn
85 g (140 ml) pitlose rosyne
45 ml appelkooskonfyt
sout en varsgemaalde peper

Eiervla
3 eiers
250 ml melk

Maalvleisvulsel
Verhit die lugbraaier tot 180 °C. Verhit die botter in ’n pan in die lugbraaier tot warm. Braai die uie en knoffel daarin tot die uie deurskynend is. Voeg die kerriepoeier, borrie en suurlemoensap by en meng deur. Braai tot geurig. Voeg die maalvleis by, meng goed en braai tot verbruin. Giet die melk van die brood af (hou die ekstra melk vir die vla), druk fyn en meng deur die maalvleismengsel. Voeg die appel, piesang, wyn, rosyne en appelkooskonfyt by en meng. Gebruik ’n lepel en maak die vulsel hoër in die middel van die pan sodat die eiervla aan die kante van die pan kan opdam.

Eiervla
Klits die eiers en melk saam en giet dit oor die maalvleis. Bak 25–35 minute in die verhitte lugbraaier tot die vla gestol het.

Bestel Herman se Lugbraaier-tydskrif aanlyn – kliek hier