Herman Lensing
Vrugteslaai kan gou in ’n gemors ontaard. Ek het grootgeword met blikkies gemengde vrugte as ons soetbederf op ’n Sondag. Probeer dié een.
genoeg vir 6 persone
1 vanieljepeul, oopgesny en saadjies uitgekrap
200 g (250 ml) suiker
250 ml water
sap en skil van 1 suurlemoen
400 g aarbeie, gehalveer
200 g bloubessies
200 g vars kersies, ontpit
1 liter vanieljeroomys
Plaas die vanieljesaadjies en -peul in ’n middelslagpot. Voeg die suiker, water en suurlemoensap en -skil by. Meng goed en bring tot kookpunt. Laat 5 minute prut. Plaas die vrugte in ’n middelslagbak. Gooi die warm stroop daaroor. Sit voor met die roomys.
WENK: Jy kan die vrugte ook koel voorsit, en vir meer tekstuur en smaak so 100 g gekapte pistasieneute byvoeg.